ಆರೋಗ್ಯ ಸಂರಕ್ಷಣೆಯಲ್ಲಿ ಮೈಲಿಗಲ್ಲು

ಆಯುಷ್ಮಾನ್ ಭಾರತ್ ಪ್ರಧಾನ ಮಂತ್ರಿಗಳ ಜನ ಆರೋಗ್ಯ ಯೋಜನೆ(ಎಬಿ-ಪಿಎಂಜೆಎವೈ)ಯ ೬ನೇ ವಾರ್ಷಿಕೋತ್ಸವ ಆಚರಿಸುತ್ತಿರುವಾಗ, ಇದು ಅಪಾರ ಹೆಮ್ಮೆ ಮತ್ತು ಪ್ರತಿಬಿಂಬದ ಕ್ಷಣವಾಗಿದೆ. ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಅವರ ದೂರದೃಷ್ಟಿಯ ನಾಯಕತ್ವದಲ್ಲಿ ೨೦೧೮ ಸೆಪ್ಟೆಂಬರ್‌ನಲ್ಲಿ ಈ ಯೋಜನೆ ಪ್ರಾರಂಭಿಸಲಾಯಿತು. ಎಬಿ-ಪಿಎಂಜೆಎವೈ ವಿಶ್ವದ ಅತಿದೊಡ್ಡ ಆರೋಗ್ಯ ಉಪಕ್ರಮಗಳಲ್ಲಿ ಒಂದಾಗಿ ಬೆಳೆದಿದೆ. ಇದು ಎಲ್ಲಾ ನಾಗರಿಕರಿಗೆ, ವಿಶೇಷವಾಗಿ ಅತ್ಯಂತ ದುರ್ಬಲರಿಗೆ ಸಮಾನವಾದ ಆರೋಗ್ಯ ಪ್ರವೇಶ ಒದಗಿಸುವ ಸರ್ಕಾರದ ಬದ್ಧತೆಯನ್ನು ಪ್ರತಿನಿಧಿಸುತ್ತಿದೆ.
ಕಳೆದ ೬ ವರ್ಷಗಳಲ್ಲಿ ಈ ಯೋಜನೆಯು ಲಕ್ಷಾಂತರ ಜೀವಗಳಿಗೆ ತಲುಪಿದೆ. ಭರವಸೆ, ಚಿಕಿತ್ಸೆ ಮತ್ತು ಅನೇಕ ಸಂದರ್ಭಗಳಲ್ಲಿ ಜೀವ ಉಳಿಸುವ ಚಿಕಿತ್ಸೆಯನ್ನು ನೀಡುತ್ತಿದೆ. ಎಬಿ-ಪಿಎಂಜೆಎವೈ ಪ್ರಯಾಣವು ತನ್ನ ಜನರ ಆರೋಗ್ಯ ಮತ್ತು ಯೋಗಕ್ಷೇಮ ಸುಧಾರಿಸುವ ಹಂಚಿಕೆಯ ಗುರಿಯೊಂದಿಗೆ ರಾಷ್ಟçವು ಒಟ್ಟಾಗಿ ಬಂದಾಗ ಏನನ್ನು ಸಾಧಿಸಬಹುದು ಎಂಬುದಕ್ಕೆ ಸಾಕ್ಷಿಯಾಗಿದೆ.
ಆಯುಷ್ಮಾನ್ ಭಾರತ್ ಯೋಜನೆಯ ಮುಖ್ಯ ಧ್ಯೇಯ ಸರಳವಾಗಿದೆ, ಆದರೆ ಆಳವಾಗಿದೆ. ಯಾವುದೇ ಭಾರತೀಯರಿಗೆ ಅವರ ಆರ್ಥಿಕ ಸ್ಥಿತಿಯ ಕಾರಣದಿಂದ ಆರೋಗ್ಯ ಸೇವೆ ನಿರಾಕರಿಸಬಾರದು ಎಂಬುದನ್ನು ಖಚಿತಪಡಿಸುತ್ತಿದೆ. ದ್ವಿತೀಯ ಮತ್ತು ತೃತೀಯ ಆಸ್ಪತ್ರೆಯಲ್ಲಿ ಆರೈಕೆ ಪಡೆಯಲು ಪ್ರತಿ ಕುಟುಂಬಕ್ಕೆ ೫ ಲಕ್ಷ ರೂ. ವಾರ್ಷಿಕ ರಕ್ಷಣೆ ಒದಗಿಸುವುದರೊಂದಿಗೆ, ಎಬಿ-ಪಿಎಂಜೆಎವೈ ಯೋಜನೆಯು ಆರ್ಥಿಕವಾಗಿ ಹಿಂದುಳಿದ ಕುಟುಂಬಗಳಿಗೆ ದೇಶದ ಕೆಲವು ಅತ್ಯುತ್ತಮ ಆಸ್ಪತ್ರೆಗಳಲ್ಲಿ ಗುಣಮಟ್ಟದ ವೈದ್ಯಕೀಯ ಸೇವೆಯನ್ನು ಉಚಿತವಾಗಿ ಪಡೆಯಲು ಮಾರ್ಗ ಒದಗಿಸಿದೆ.
೭೦ ವರ್ಷ ಮತ್ತು ಅದಕ್ಕಿಂತ ಹೆಚ್ಚಿನ ವಯಸ್ಸಿನ ಎಲ್ಲಾ ಹಿರಿಯ ನಾಗರಿಕರಿಗೆ ಅವರ ಸಾಮಾಜಿಕ ಮತ್ತು ಆರ್ಥಿಕ ಪರಿಸ್ಥಿತಿ ಲೆಕ್ಕಿಸದೆ ಎಬಿ-ಪಿಎಂಜೆಎವೈ ಯೋಜನೆಯ ಪ್ರಯೋಜನಗಳನ್ನು ವಿಸ್ತರಿಸುವ ನಿರ್ಧಾರವು, ದೇಶದಲ್ಲಿ ಬದಲಾಗುತ್ತಿರುವ ಜನಸಂಖ್ಯಾ ಪರಿಸ್ಥಿತಿಯನ್ನು ಗಣನೆಗೆ ತೆಗೆದುಕೊಳ್ಳುವ ಸೂಕ್ಷ್ಮವಾದ ಮತ್ತು ದಿಟ್ಟ ಹೆಜ್ಜೆಯಾಗಿದೆ. ಈ ಹಿಂದೆ, ಸಮುದಾಯ ಆರೋಗ್ಯ ಕಾರ್ಯಕರ್ತರ ಕುಟುಂಬಗಳು ಮಾನ್ಯತೆ ಪಡೆದ ಸಾಮಾಜಿಕ ಆರೋಗ್ಯ ಕಾರ್ಯಕರ್ತ(ಆಶಾ), ಅಂಗನವಾಡಿ ಕಾರ್ಯಕರ್ತೆಯರು ಮತ್ತು ಅಂಗನವಾಡಿ ಸಹಾಯಕಿಯರನ್ನು ಯೋಜನೆಯ ಅಡಿ ತರಲಾಯಿತು. ಆದರೆ ಇದೀಗ ಈ ಯೋಜನೆಯಡಿ, ೫೫ ಕೋಟಿಗೂ ಹೆಚ್ಚು ಜನರು ಆರೋಗ್ಯ ಸೇವೆಗಳಿಗೆ ಅರ್ಹರಾಗಿದ್ದಾರೆ, ೭.೫ ಕೋಟಿಗಿಂತ ಹೆಚ್ಚಿನ ಚಿಕಿತ್ಸೆಗಳನ್ನು ೧ ಲಕ್ಷ ಕೋಟಿ ರೂ.ಗಿಂತ ಹೆಚ್ಚಿನ ಮೊತ್ತದಲ್ಲಿ ಯಶಸ್ವಿಯಾಗಿ ಒದಗಿಸಲಾಗಿದೆ, ಇದೊಂದು ಗಮನಾರ್ಹ ಸಾಧನೆ. ಅಪಾಯಕಾರಿ ಆರೋಗ್ಯ ವೆಚ್ಚಗಳಿಂದ ಒಮ್ಮೆ ಬಡತನಕ್ಕೆ ತಳ್ಳಲ್ಪಟ್ಟ ಕುಟುಂಬಗಳು ಈಗ ಅಂತಹ ಬಿಕ್ಕಟ್ಟುಗಳಿಂದ ರಕ್ಷಿಸುವ ಆರ್ಥಿಕ ಗುರಾಣಿಯನ್ನು ಈ ಯೋಜನೆ ಹೊಂದಿವೆ. ಗಂಡಾಂತರಕಾರಿ ಆರೋಗ್ಯ ವೆಚ್ಚಗಳನ್ನು ಎದುರಿಸುತ್ತಿರುವ ಕುಟುಂಬಗಳಿಗೆ ಈ ಯೋಜನೆಯು ಜೀವನಾಡಿಯಾಗಿದೆ. ಫಲಾನುಭವಿಗಳಿಂದ ಪ್ರಶಂಸಾಪತ್ರಗಳಿಂದ ಹಿಡಿದು ರೈತರಿಂದ ದೈನಂದಿನ ಕೂಲಿ ಕಾರ್ಮಿಕರವರೆಗೆ ಈ ಯೋಜನೆ ವಿಸ್ತಾರಗೊಂಡಿದೆ.
ಯೋಜನೆಯ ವ್ಯಾಪ್ತಿ ಸಮಗ್ರವಾಗಿದ್ದು, ೧೯೦೦ಕ್ಕೂ ಹೆಚ್ಚು ವೈದ್ಯಕೀಯ ಕಾರ್ಯವಿಧಾನಗಳನ್ನು ಒಳಗೊಂಡಿದೆ, ಹೃದಯದ ಬೈಪಾಸ್‌ನಂತಹ ಸಂಕೀರ್ಣ ಶಸ್ತ್ರಚಿಕಿತ್ಸೆಗಳು ಮತ್ತು ಹೃದಯ ಜಂಟಿ ಬದಲಿಗಳಿಂದ ಹಿಡಿದು ಕ್ಯಾನ್ಸರ್ ಮತ್ತು ಮೂತ್ರಪಿಂಡದಂತಹ ಕಾಯಿಲೆಗಳಿಗೆ ಚಿಕಿತ್ಸೆಗಳು ಸಿಗುತ್ತಿವೆ. ಇವುಗಳು ಈ ಹಿಂದೆ ಹಲವರಿಗೆ ತಲುಪಲು ಸಾಧ್ಯವಾಗದ ಚಿಕಿತ್ಸೆಗಳಾಗಿದ್ದವು, ಆದರೆ ಎಬಿ-ಪಿಎಂಜೆಎವೈ ಯೋಜನೆಯು ಅವುಗಳನ್ನು ಸುಲಭವಾಗಿ, ಕೈಗೆಟುಕುವ ಬೆಲೆಗೆ ಮತ್ತು ಎಲ್ಲರಿಗೂ ಲಭ್ಯವಾಗುವಂತೆ ಮಾಡಿದೆ.
ಜಾಲ ವಿಸ್ತರಣೆ, ವ್ಯವಸ್ಥೆಯ ಬಲವರ್ಧನೆ
ಎಬಿ-ಪಿಎಂಜೆಎವೈ ಯೋಜನೆಯ ವಿಶಿಷ್ಟ ಲಕ್ಷಣವೆಂದರೆ ಆರೋಗ್ಯ ಪೂರೈಕೆದಾರರ ಸದೃಢವಾದ ಜಾಲ ನಿರ್ಮಿಸುವ ಸಾಮರ್ಥ್ಯ ಹೊಂದಿದೆ. ಇಂದು ೧೩,೦೦೦ ಖಾಸಗಿ ಆಸ್ಪತ್ರೆಗಳು ಸೇರಿದಂತೆ ಭಾರತದಾದ್ಯಂತ ೨೯,೦೦೦ಕ್ಕೂ ಹೆಚ್ಚು ಆಸ್ಪತ್ರೆಗಳು ಯೋಜನೆಯಡಿ ನೋಂದಾಯಿಸಿಕೊಂಡಿವೆ. ಈ ಜಾಲವು ಗ್ರಾಮೀಣ ಮತ್ತು ನಗರ ಪ್ರದೇಶಗಳನ್ನು ಸಮಾನವಾಗಿ ವ್ಯಾಪಿಸಿದೆ. ದೇಶದ ಅತ್ಯಂತ ದೂರದ ಭಾಗಗಳಲ್ಲಿ ವಾಸಿಸುವವರೂ ಗುಣಮಟ್ಟದ ಆರೋಗ್ಯ ಸೇವೆಗಳನ್ನು ಪ್ರವೇಶಿಸಬಹುದು ಎಂಬುದನ್ನು ಖಚಿತಪಡಿಸುತ್ತದೆ. ಯೋಜನೆಯ ``ವಿಶಿಷ್ಟ ಪೋರ್ಟೆಬಿಲಿಟಿ'' ವೈಶಿಷ್ಟ÷್ಯವು ಫಲಾನುಭವಿಗಳು ಅವರು ಸೇರಿರುವ ರಾಜ್ಯದ ಜತೆಗೆ ದೇಶಾದ್ಯಂತ ಇರುವ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆಯಬಹುದು ಎಂಬುದನ್ನು ಖಚಿತಪಡಿಸಿದೆ.
ಈ ವಿಶಾಲವಾದ ಜಾಲವು ಸದೃಢವಾದ ಐಟಿ ಮೂಲಸೌಕರ್ಯದಿಂದ ಬೆಂಬಲಿತವಾಗಿದೆ. ಅದು ಕ್ಲೇಮುಗಳ ಇತ್ಯರ್ಥದಲ್ಲಿ ಪಾರದರ್ಶಕತೆ, ದಕ್ಷತೆ ಮತ್ತು ವೇಗವನ್ನು ಖಾತ್ರಿಗೊಳಿಸುತ್ತದೆ. ಆಧಾರ್ ಆಧಾರಿತ ಬಯೋಮೆಟ್ರಿಕ್ ಪರಿಶೀಲನೆ ಮತ್ತು ಪೇಪರ್‌ಲೆಸ್ ಕ್ಲೇಮು ಪ್ರಕ್ರಿಯೆ ಅನುಷ್ಠಾನವು ವಂಚನೆ ಮತ್ತು ಅಸಮರ್ಥತೆಯನ್ನು ಬಹಳಷ್ಟು ಕಡಿಮೆ ಮಾಡಿದೆ.
ಆಯುಷ್ಮಾನ್ ಭಾರತ್‌ನ ಯಶಸ್ಸು ಆರೋಗ್ಯ ಸಂರಕ್ಷಣೆಯ ಪರಿಸರ ವ್ಯವಸ್ಥೆಯ ಇತರ ಭಾಗಗಳಲ್ಲಿ ಸುಧಾರಣೆಗಳನ್ನು ವೇಗಗೊಳಿಸಿದೆ. ಗುಣಮಟ್ಟದ ಆರೋಗ್ಯ ಸಂರಕ್ಷಣೆಗೆ ಯೋಜನೆಯು ಒತ್ತು ನೀಡುವುದರಿಂದ ಸಾರ್ವಜನಿಕ ಮತ್ತು ಖಾಸಗಿ ಆಸ್ಪತ್ರೆಗಳು ತಮ್ಮ ಮೂಲಸೌಕರ್ಯ ಮತ್ತು ಸೇವೆಗಳನ್ನು ಮೇಲ್ದರ್ಜೆಗೇರಿಸುವಂತೆ ಮಾಡಿದೆ. ಹೆಚ್ಚುವರಿಯಾಗಿ, ಇದು ಆರೋಗ್ಯಕರ ಸ್ಪರ್ಧೆಯ ವಾತಾವರಣ ಬೆಳೆಸಿದೆ. ಜತೆಗೆ, ರೋಗಿಗಳ ಆರೈಕೆ ಹೆಚ್ಚಿಸಲು ಪೂರೈಕೆದಾರರನ್ನು ಪ್ರೋತ್ಸಾಹಿಸುತ್ತದೆ.
ಸಮಗ್ರ ಆರೋಗ್ಯ ಸಂರಕ್ಷಣೆಯ ಮೇಲೆ ಗಮನ
ಆಯುಷ್ಮಾನ್ ಭಾರತ್ ಕೇವಲ ಆಸ್ಪತ್ರೆಯ ಆರೈಕೆಯಲ್ಲ. ಎಬಿ-ಪಿಎಂಜೆಎವೈ ಯೋಜನೆಯ ಜತೆಗೆ ಸರ್ಕಾರವು, ಆಯುಷ್ಮಾನ್ ಆರೋಗ್ಯ ಮಂದಿರ(ಎಎಎಂ) ಸ್ಥಾಪನೆ ಮೂಲಕ ಪ್ರಾಥಮಿಕ ಆರೋಗ್ಯ ಸೇವೆಗಳನ್ನು ಬಲಪಡಿಸಲು ಕೆಲಸ ಮಾಡುತ್ತಿದೆ. ಈ ಆರೋಗ್ಯ ಕೇಂದ್ರಗಳು ತಡೆಗಟ್ಟುವ ಮತ್ತು ಉತ್ತೇಜಿಸುವ ಆರೋಗ್ಯ ಸಂರಕ್ಷಣೆಯ ಮೇಲೆ ಗಮನ ಕೇಂದ್ರೀಕರಿಸಿದೆ. ಜನಸಂಖ್ಯೆಯಲ್ಲಿ ರೋಗದ ಒಟ್ಟಾರೆ ಹೊರೆ ಕಡಿಮೆ ಮಾಡುವ ಗುರಿ ಹೊಂದಿವೆ. ಇಲ್ಲಿಯವರೆಗೆ, ಭಾರತದಾದ್ಯಂತ ೧.೭೩ ಲಕ್ಷಕ್ಕೂ ಹೆಚ್ಚು ಎಎಎಂಗಳನ್ನು ಸ್ಥಾಪಿಸಲಾಗಿದೆ. ಉಚಿತ ತಪಾಸಣೆ, ರೋಗ ಪತ್ತೆ ಮತ್ತು ಸಾಮಾನ್ಯ ಕಾಯಿಲೆಗಳು, ಮಧುಮೇಹ, ಅಧಿಕ ರಕ್ತದೊತ್ತಡ ಮತ್ತು ಕ್ಯಾನ್ಸರ್‌ನಂತಹ ದೀರ್ಘಕಾಲದ ಪರಿಸ್ಥಿತಿಗಳಿಗೆ ಔಷಧಿಗಳನ್ನು ಒದಗಿಸುತ್ತದೆ.
ಈ ಕೇಂದ್ರಗಳು ಹೆಚ್ಚು ಸಮಗ್ರ ಮತ್ತು ಏಕೀಕೃತ ಆರೋಗ್ಯ ರಕ್ಷಣೆಯ ಮಾದರಿಯತ್ತ ಸಾಗುವ ನಮ್ಮ ಪ್ರಯತ್ನದ ಹೃದಯ ಭಾಗದಲ್ಲಿವೆ. ಯೋಗಕ್ಷೇಮ ಮತ್ತು ಆರಂಭಿಕ ರೋಗ ಪತ್ತೆಯನ್ನು ಉತ್ತೇಜಿಸುವ ಮೂಲಕ, ಆಸ್ಪತ್ರೆಗೆ ಸೇರಿಸುವ ಅಗತ್ಯವನ್ನು ಕಡಿಮೆ ಮಾಡಲು ಮತ್ತು ದೀರ್ಘಾವಧಿಯಲ್ಲಿ ಆರೋಗ್ಯವನ್ನು ಹೆಚ್ಚು ಸಮರ್ಥನೀಯವಾಗಿಸಲು ಪ್ರಯತ್ನ ಸಾಗಿದೆ.
ಸವಾಲುಗಳನ್ನು ಜಯಿಸಿ ಮುಂದೆ ಸಾಗುವುದು
ಆಯುಷ್ಮಾನ್ ಭಾರತ್‌ನ ಸಾಧನೆಗಳನ್ನು ಆಚರಿಸುವಾಗ, ಮುಂದೆ ಎದುರಾಗುವ ಸವಾಲುಗಳನ್ನು ಸಹ ಒಪ್ಪಿಕೊಳ್ಳಬೇಕು. ಯೋಜನೆಯ ಪ್ರಮಾಣವು ಅಗಾಧವಾಗಿದೆ ಮತ್ತು ಅದರೊಂದಿಗೆ ನಿರಂತರವಾಗಿ ಹೊಂದಿಕೊಳ್ಳುವ, ಪರಿಷ್ಕರಿಸುವ ಮತ್ತು ಸುಧಾರಿಸುವ ಜವಾಬ್ದಾರಿ ಬರುತ್ತದೆ. ಯೋಜನೆಯ ವ್ಯಾಪ್ತಿಯನ್ನು ವಿಸ್ತರಿಸಲು, ಆಸ್ಪತ್ರೆಗಳಿಗೆ ಸಕಾಲಿಕ ಪಾವತಿಗಳನ್ನು ಖಚಿತಪಡಿಸಿಕೊಳ್ಳಲು ಮತ್ತು ಪ್ರತಿ ಫಲಾನುಭವಿಗೆ ಒದಗಿಸಲಾದ ಆರೈಕೆಯ ಗುಣಮಟ್ಟ ಹೆಚ್ಚಿಸಲು ಕ್ರಮಕೈಗೊಳ್ಳಲಾಗುತ್ತಿದೆ. ಆಯುಷ್ಮಾನ್ ಭಾರತ್ ಯೋಜನೆಯಡಿ ಒಳಗೊಂಡಿರುವ ಚಿಕಿತ್ಸೆಗಳ ಪಟ್ಟಿ ವಿಸ್ತರಿಸಲು, ನೋಂದಾಯಿತ ಆಸ್ಪತ್ರೆಗಳ ಸಂಖ್ಯೆಯನ್ನು ಮತ್ತಷ್ಟು ಹೆಚ್ಚಿಸಲು ಮತ್ತು ಆಯುಷ್ಮಾನ್ ಆರೋಗ್ಯ ಮಂದಿರಗಳ ಯಶಸ್ಸಿನ ಮೇಲೆ ನಿರ್ಮಿಸಲು ಬದ್ಧರಾಗಿದ್ದೇವೆ.
ಆರೋಗ್ಯಕರ ಭಾರತಕ್ಕಾಗಿ ಮುನ್ನೋಟ
ಆರೋಗ್ಯಕರ ಜನಸಂಖ್ಯೆಯು ದೇಶದ ಬೆಳವಣಿಗೆ, ಉತ್ಪಾದಕತೆ ಮತ್ತು ನಾವೀನ್ಯತೆಗೆ ಕೊಡುಗೆ ನೀಡಲು ಉತ್ತಮವಾಗಿ ಸಜ್ಜಾಗಿದೆ. ಆಯುಷ್ಮಾನ್ ಭಾರತ್ ಈ ದೃಷ್ಟಿಯಲ್ಲಿ ಆರೋಗ್ಯಕರ, ಬಲವಾದ ಮತ್ತು ವಿಕಸಿತ ಭಾರತದ ಕೇಂದ್ರವಾಗಿದೆ. ಇದುವರೆಗಿನ ಯೋಜನೆಯ ಯಶಸ್ಸು ಸರ್ಕಾರ, ಆರೋಗ್ಯ ಸೇವೆ ಪೂರೈಕೆದಾರರು ಮತ್ತು ಜನರ ನಡುವಿನ ಕಠಿಣ ಪರಿಶ್ರಮ, ಸಮರ್ಪಣೆ ಮತ್ತು ಸಹಭಾಗಿತ್ವವನ್ನು ಪ್ರತಿಬಿಂಬಿಸುತ್ತಿದೆ. ಆದರೆ, ಸಾಗಬೇಕಾದ ದೂರ ಇನ್ನೂ ಇದೆ. ಪ್ರತಿಯೊಬ್ಬ ನಾಗರಿಕನ ಯೋಗಕ್ಷೇಮ ಮತ್ತು ಆರೋಗ್ಯದ ದೂರದೃಷ್ಟಿಗೆ ನಾವು ಬದ್ಧರಾಗಿರುತ್ತೇವೆ.
ಆಯುಷ್ಮಾನ್ ಭಾರತ್ ಪ್ರಧಾನ ಮಂತ್ರಿ ಜನ್ ಆರೋಗ್ಯ ಯೋಜನೆಯ ಈ ೬ನೇ ವಾರ್ಷಿಕೋತ್ಸವದಲ್ಲಿ ಎಲ್ಲರನ್ನೂ ಒಳಗೊಳ್ಳುವ, ಪ್ರವೇಶಿಸಬಹುದಾದ ಮತ್ತು ಸಹಾನುಭೂತಿಯ ಆರೋಗ್ಯ ವ್ಯವಸ್ಥೆ ನಿರ್ಮಿಸುವ ನಮ್ಮ ಸಮರ್ಪಣೆಯನ್ನು ಪುನರುಚ್ಚರಿಸೋಣ. ಒಟ್ಟಾಗಿ, ನಾವು ಮುಂದಿನ ಪೀಳಿಗೆಗೆ ಆರೋಗ್ಯಕರ ಭಾರತ ನಿರ್ಮಿಸುವುದನ್ನು ಮುಂದುವರಿಸುತ್ತೇವೆ.