ಪತ್ನಿ ಶೀಲ ಶಂಕಿಸಿ ಕೊಲೆ: ಆರೋಪಿ ಬಂಧನ

ಕುಷ್ಟಗಿ: ಪತ್ನಿ ಶೀಲ ಶಂಕಿಸಿ ಪತಿ ಕುತ್ತಿಗೆ ಹಿಚುಕಿ ಕೊಲೆ ಮಾಡಿ, ಸೀರೆಯಿಂದ ಕುತ್ತಿಗೆಗೆ ಬಿಗಿದು ನೇಣು ಹಾಕಿದ ಘಟನೆ ಸೋಮವಾರ ರಾತ್ರಿ ತಾಲೂಕಿನ ತೊನಸಿಹಾಳ ತಾಂಡದಲ್ಲಿ ನಡೆದಿದೆ.
ತೊನಸಿಹಾಳ ತಾಂಡಾದ ರೇಣುಕಾ ವೆಂಕಟೇಶ ಚವ್ಹಾಣ(೩೦) ಮೃತಪಟ್ಟ ಮಹಿಳೆ ಎನ್ನಲಾಗಿದೆ. ವೆಂಕಟೇಶ ಚವ್ಹಾಣ ಕೊಲೆ ಆರೋಪಿ.
ಪತಿ, ಪತ್ನಿ ಸೋಮವಾರ ರಾತ್ರಿ ಊಟ ಮಾಡಿ ಮಲಗಿದ್ದಾರೆ. ನಂತರ ವೆಂಕಟೇಶ, ಪತ್ನಿಯನ್ನು ಕುತ್ತಿಗೆ ಹಿಚುಕಿ ಸಾಯಿಸಿ, ಸೀರೆಯಿಂದ ನೇಣು ಬಿಗಿದು ಹತ್ಯೆ ಮಾಡಿದ್ದಾನೆ ಎಂದು ಮೃತಳ ತಂದೆ ಪಾಂಡಪ್ಪ ಕುಷ್ಟಗಿ ಪೊಲೀಸ್ ಠಾಣೆಗೆ ನೀಡಿದ ದೂರಿನಿಂದ ತಿಳಿದುಬಂದಿದೆ.
ಆರೋಪಿಗೆ ಇಬ್ಬರು ಪತ್ನಿಯರು. ಕೊಲೆಯಾದ ರೇಣುಕಾ ಎರಡನೇ ಪತ್ನಿ. ಆರೋಪಿ ವೆಂಕಟೇಶ ಹಾಗೂ ರೇಣುಕಾ ಪ್ರೀತಿಸಿ ಆರು ವರ್ಷಗಳ ಹಿಂದೆ ಪಟ್ಟಣದ ಅನ್ನಪೂರ್ಣೇಶ್ವರಿ ದೇವಸ್ಥಾನದಲ್ಲಿ ಮದುವೆಯಾಗಿದ್ದರು. ಮೃತ ಮಹಿಳೆಗೆ ಇಬ್ಬರು ಪುತ್ರರು ಇದ್ದಾರೆ.
ವೆಂಕಟೇಶ ಮೊದಲ ಪತ್ನಿ ಲಕ್ಷ್ಮವ್ವ. ಎಲ್ಲರೂ ಕೂಡಿ ಒಂದೇ ಮನೆಯಲ್ಲಿ ವಾಸವಾಗಿದ್ದರು. ಮೊದಲನೇ ಪತ್ನಿಗೆ ಮಕ್ಕಳಿಲ್ಲ. ಕೆಲ ದಿನದ ಹಿಂದೆ ಎರಡನೇ ಪತ್ನಿ ಶೀಲ ಶಂಕಿಸಿ ವೆಂಕಟೇಶ ಕಾಲು ಮೇಲೆ ಕಲ್ಲು ಎತ್ತಿ ಹಾಕಿ ಕಾಲು ಮುರಿದಿದ್ದು. ಸೋಮವಾರ ರಾತ್ರಿ ಕುತ್ತಿಗೆ ಹಿಚುಕಿ ಸಾಯಿಸಿ, ಸೀರೆಯಿಂದ ಕುತ್ತಿಗೆಗೆ ಬಿಗಿದು ನೇಣು ಹಾಕಿ ಕೊಲೆ ಮಾಡಿದ್ದಾನೆ ಎನ್ನಲಾಗಿದೆ.