ಬನಾರಸ್ ಹುಡುಗನಿಗೆ ಉಪಾಧ್ಯಕ್ಷ ನಿರ್ದೇಶಕ ಅನಿಲ್ ನಿರ್ದೇಶನ
ಬನಾರಸ್ ಸಿನಿಮಾದ ಬಳಿಕ ಝಾಯಿದ್ ಖಾನ್ ಏನು ಮಾಡುತ್ತಿದ್ದಾರೆ ಎಂಬ ಕುತೂಹಲ ಎಲ್ಲರಿಗೂ ಇತ್ತು. ಅದಕ್ಕೀಗ ತೆರೆ ಬಿದ್ದಿದೆ. ತನ್ನ ಚೊಚ್ಚಲ ಸಿನಿಮಾದ ಬಳಿಕ ಹಲವಾರು ಸ್ಕ್ರಿಪ್ಟ್ ಆಲಿಸಿದ ಝಾಯಿದ್ ಈಗ ಎರಡನೇ ಸಿನಿಮಾಕ್ಕೆ ಗ್ರೀನ್ ಸಿಗ್ನಲ್ ಕೊಟ್ಟಿದ್ದಾರೆ. ಸ್ಕ್ರಿಪ್ಟ್ ಕೇಳುವುದರ ಜತೆಗೆ ಮೈ ಹುರಿಗೊಳಿಸಿಕೊಳ್ಳುತ್ತಿದ್ದ ಅವರ ತಯಾರಿಯೂ ಮುಕ್ತಾಯದ ಹಂತ ತಲುಪಿದೆ.
ಅವರ ಎರಡನೇ ಸಿನಿಮಾಕ್ಕೆ ಅನಿಲ್ ಕುಮಾರ್ ಆಕ್ಷನ್ ಕಟ್ ಹೇಳುತ್ತಿದ್ದಾರೆ. ಕೆಂಪೇಗೌಡ ಸಿನಿಮಾಗೆ ಸಂಭಾಷಣೆ ಬರೆಯುವ ಮೂಲಕ ಖ್ಯಾತರಾದ ಅನಿಲ್, ಮಾಲಾಶ್ರೀ ನಟನೆಯ ಶಕ್ತಿ, ಸುಮಂತ್ ಮತ್ತು ರಾಧಿಕಾ ಪಂಡಿತ್ ನಟಿಸಿದ್ದ ದಿಲ್‌ವಾಲ, ಶರಣ್ ಅಭಿನಯದ ರ‍್ಯಾಂಬೊ-೨ ಹಾಗೂ ಇತ್ತೀಚೆಗೆ ತೆರೆಕಂಡ ಚಿಕ್ಕಣ್ಣ ನಟನೆಯ ಉಪಾಧ್ಯಕ್ಷ ಚಿತ್ರವನ್ನು ನಿರ್ದೇಶಿಸಿದ ಅನುಭವವಿದೆ. ಝಾಯಿದ್ ಖಾನ್ ಅವರಿಗಾಗಿಯೇ ಸ್ಕ್ರಿಪ್ಟ್ ಮಾಡಿರುವ ಅನಿಲ್, ಮಾಸ್ ಮತ್ತು ಕ್ಲಾಸ್ ವರ್ಗಕ್ಕೆ ಅನುಗುಣವಾಗಿ ಕಥೆ ಹೆಣೆದಿದ್ದಾರೆ.
ಈ ಚಿತ್ರದ ಮೂಲಕ ಝಾಯಿದ್ ಖಾನ್‌ಗೆ ಸ್ಟೈಲಿಶ್ ಸ್ಟಾರ್ ಪಟ್ಟ ಸಿಕ್ಕಿದೆ. ಚಿತ್ರದ ಪಾತ್ರ ಪೋಷಣೆಯೂ ಹಾಗೇ ಇರುವುದರಿಂದ ಸ್ಟೈಲಿಶ್ ಸ್ಟಾರ್ ಸೂಕ್ತ ಎಂದು ಚಿತ್ರತಂಡ ಹಾಗೂ ಅವರ ಅಭಿಮಾನಿ ಬಳಗ ನಿರ್ಧರಿಸಿದೆ. ಸದ್ಯದಲ್ಲೇ ಸಿನಿಮಾದ ಮುಹೂರ್ತ ನೆರವೇರಲಿದ್ದು, ಅದಕ್ಕೂ ಮುನ್ನ ಫೋಟೋಶೂಟ್, ಟೀಸರ್ ಮೂಲಕ ಸದ್ದು ಮಾಡುವ ಆಲೋಚನೆ ಚಿತ್ರತಂಡಕ್ಕಿದೆ.
ಈ ಚಿತ್ರವನ್ನು ಪ್ರತಿಷ್ಠಿತ ನಿರ್ಮಾಣ ಸಂಸ್ಥೆಯೊಂದು ನಿರ್ಮಿಸುತ್ತಿದ್ದು ಅದರ ಸಂಪೂರ್ಣ ವಿವರ ಹಾಗೂ ಉಳಿದ ತಾಂತ್ರಿಕ ಬಳಗ, ತಾರಾಗಣದ ಕುರಿತು ಸದ್ಯದಲ್ಲೇ ಮತ್ತಷ್ಟು ಮಾಹಿತಿ ಹಂಚಿಕೊಳ್ಳಲಿದ್ದಾರೆ ಅನಿಲ್.
