ಸಂಸದರ ಮನೆಗೆಯಂಗಳಕ್ಕೆ ಬಂದ ಅಪರೂಪದ ಅತಿಥಿ…!

ಶಿರಸಿ: ಚಿರತೆ ಈಗ ನೇರವಾಗಿ ಸಂಸದರ ಮನೆಗೇ ದಾಂಗುಡಿ ಇಟ್ಟಿದೆ.
ಹೆಚ್ಚುತ್ತಿರುವ ಹೊಸ ಅರಣ್ಯ ಅತಿಕ್ರಮಣ, ಕಾಡು ನಾಶ ತಡೆದು, ಅರಣ್ಯ ಅತಿಕ್ರಮಣದಾರರಿಂದ ತಮ್ಮ ಆವಾಸಸ್ಥಾನವನ್ನು ರಕ್ಷಿಸುವಂತೆ ಸಂಸದರಿಗೆ ಮನವಿ ನೀಡಲು ಬೆಳಗಿನ ಜಾವ ಸಂತ್ರಸ್ತ ವನ್ಯಮೃಗಗಳ ಪರವಾಗಿ ಚಿರತೆ ಉತ್ತರ ಕನ್ನಡ ಜಿಲ್ಲೆಯ ಸಂಸದ ವಿಶ್ವೇಶ್ವರ ಹೆಗಡೆ ಕಾಗೇರಿ ಅವರ ಮನೆಯ ಅಂಗಳಕ್ಕೆ ಬಂದಂತೆ ಗೋಚರಿಸಿತು.
ಸಾಕುನಾಯಿ ಬೊಗಳಿ ಅಡ್ಡಿಪಡಿಸಿದ್ದರಿಂದ ಅದನ್ನು ಅಟ್ಟಿಸಿಕೊಂಡು ಹೋಗಿದ್ದು, ಚಿರತೆ ಹಿಂತಿರುಗಿದೆ.
ಉತ್ತರ ಕನ್ನಡ ಜಿಲ್ಲೆಯ ಸಂಸದ ವಿಶ್ವೇಶ್ವರ ಹೆಗಡೆ ಕಾಗೇರಿ ಮನೆಯ ಅಂಗಳಕ್ಕೆ ಬಂದ ಚಿರತೆಯನ್ನು ಸಂಸದರ ಮನೆಯ ಸಾಕು ನಾಯಿಯನ್ನು ಅಟ್ಟಿಸಿಕೊಂಡು ಹೋಗಿರುವ ದೃಶ್ಯ ಸಿಸಿ ಕ್ಯಾಮೆರಾದಲ್ಲಿ ಸೆರೆಯಾಗಿದೆ.
ಸೋಮವಾರ ಬೆಳಗಿನ ಜಾವ ಶಿರಸಿ ತಾಲೂಕಿನ ಕಾಗೇರಿ ಗ್ರಾಮದಲ್ಲಿನ ಸಂಸದ ವಿಶ್ವೇಶ್ವರ ಹೆಗಡೆ ಕಾಗೇರಿಯವರ ಮನೆಯಂಗಳದಲ್ಲಿ ಈ ಘಟನೆ ನಡೆದಿದ್ದು, ಸಂಸದರು ಹಾಗೂ ಅವರ ಕುಟುಂಬ ಸದಸ್ಯರು ಮನೆಯಲ್ಲಿ ವಿಶ್ರಾಂತಿಯಲ್ಲಿದ್ದರು. ಬೆಳಗಿನ ಜಾವ ೩.೪೦ ಗಂಟೆಯ ಸುಮಾರಿಗೆ ಚಿರತೆ ಸಂಸದರ ಮನೆಯ ಅಂಗಳ ಪ್ರವೇಶಿಸಿರುವ ಚಿರತೆ ಮನೆಯ ಮುಂಭಾಗದಲ್ಲಿದ್ದ ಸಾಕುನಾಯಿಯನ್ನು ಅಟ್ಟಿಸಿಕೊಂಡು ಹೋಗಿದೆ. ಚಿರತೆ ದಾಳಿಯಿಂದ ಸಾಕು ನಾಯಿ ತಪ್ಪಿಸಿಕೊಂಡಿದೆ. ರಾತ್ರಿ ಮನೆಯ ನಾಯಿ ಹೆಚ್ಚು ಕೂಗಿದ್ದರಿಂದಾಗಿ ಮಂಗಳವಾರ ಬೆಳಿಗ್ಗೆ ಮನೆಯವರು ಸಿಸಿ ಟಿವಿ ದೃಶ್ಯ ವೀಕ್ಷಿಸಿದಾಗ ಚಿರತೆ ಮನೆಯ ಅಂಗಳಕ್ಕೆ ಬಂದ ವಿಷಯ ತಿಳಿದಿದೆ.
ಘಟನೆ ಸಂಬಂಧ ಅರಣ್ಯಾಧಿಕಾರಿಗಳಿಗೆ ಮಾಹಿತಿ ನೀಡಿದ್ದು, ಸ್ಥಳಕ್ಕಾಗಮಿಸಿ ಪರಿಶೀಲನೆ ನಡೆಸಿದ್ದಾರೆ. ಚಿರತೆ ಸಂಸದರ ಮನೆಯ ಅಂಗಳಕ್ಕೆ ಬಂದರೂ ಯಾವುದೇ ಅಪಾಯ ಎದುರಾಗಿಲ್ಲ. ಈ ಭಾಗದಲ್ಲಿ ಚಿರತೆ ಓಡಾಟ ಸಾಮಾನ್ಯವಾಗಿದ್ದು, ಇತ್ತೀಚೆಗೆ ಅಹಾರ ಅರಸಿ ನಾಡಿನತ್ತ ಆಗಮಿಸುತ್ತಿದ್ದು ಇದೇ ಮೊದಲ ಬಾರಿ ಕಾಗೇರಿ ಗ್ರಾಮದಲ್ಲಿ ಚಿರತೆ ಕಾಣಿಸಿಕೊಂಡಿದೆ.