24ರಂದು ಮುತ್ತುಸ್ವಾಮಿ ದೀಕ್ಷಿತರ ಆರಾಧನಾ ಸಂಗೀತೋತ್ಸವ

ಬೆಂಗಳೂರು: ರಾಜಧಾನಿಯ ಶ್ರೀ ಅನುಗ್ರಹ ಸಂಗೀತ ಮಹಾವಿದ್ಯಾಲಯ ನ. 24ರಂದು ಬನಶಂಕರಿ ಒಂದನೇ ಹಂತದ(ಪಿಇಎಸ್ ಪದವಿ ಕಾಲೇಜು ಪಕ್ಕದ) ಸ್ವಾಮಿ ವಿವೇಕಾನಂದ ಶಾಲೆ ಸಭಾಂಗಣದಲ್ಲಿ ಶ್ರೀಮುತ್ತುಸ್ವಾಮಿ ದೀಕ್ಷಿತರ ಆರಾಧನಾ ಮಹೋತ್ಸವ ಮತ್ತು ಕನಕದಾಸರ ಜಯಂತಿ ನಿಮಿತ್ತ ವಿಶೇಷ ಗಾಯನ-ವಾದನ ಕಛೇರಿಗಳನ್ನು
ಹಮ್ಮಿಕೊಂಡಿದೆ.
ಮಧ್ಯಾಹ್ನ 3:30ಕ್ಕೆ ಕಾರ್ಯಕ್ರಮವನ್ನು ಶ್ರೀಅನುಗ್ರಹ ಸಂಗೀತ ಮಹಾವಿದ್ಯಾಲಯದ ಪೋಷಕರು ಮತ್ತು ಕಸೂತಿ ಕಲಾವಿದೆ ಸುಧಾಮಣಿ ಉದ್ಘಾಟಿಸಲಿದ್ದಾರೆ. ಹಿರಿಯ ವಿದ್ವಾಂಸ ಮತ್ತು ಪ್ರಖ್ಯಾತ ಗಾಯಕ ವಿದ್ವಾನ್ ಜೆ.ಎಸ್. ಶ್ರೀಕಂಠ ಭಟ್ ಅಧ್ಯಕ್ಷತೆ ವಹಿಸುವರು. ನಂತರ ಮುತ್ತುಸ್ವಾಮಿ ದೀಕ್ಷಿತರ ನೊಟ್ಟುಸ್ವರ ಗೋಷ್ಠಿ ಗಾಯನ ನಡೆಯಲಿದೆ.
ಈ ಸಂದರ್ಭ 15 ವೀಣಾ ಕಲಾವಿದರಿಂದ ಏಕಾದಶ ವೀಣಾ ವಾದನ, ವಯೋಲಿನ್‌ನಲ್ಲಿ ಚೈತ್ರಾ ಶ್ರೀಧರ್ ನೊಟ್ಟುಸ್ವರ ವಾದನ ಮತ್ತು ವಿದ್ಯಾಲಯದ ಕಿರಿಯ ವಿದ್ಯಾರ್ಥಿಗಳಿಂದ ನೊಟ್ಟುಸ್ವರ ಗಾಯನ ವಿಶೇಷವಿದೆ. ದಾಸರಪದ ಕಲಿಕಾ ಶಿಬಿರಾರ್ಥಿಗಳಿಂದ ಮತ್ತು ವಿದ್ಯಾಲಯದ ವಿದ್ಯಾರ್ಥಿಗಳಿಂದ ಕನಕದಾಸ ಕೃತಿಗಳ ಗಾಯನವಿದೆ.
ವಿದ್ವಾಂಸರ ಕಛೇರಿ: ಸಂಜೆ 7ಕ್ಕೆ ವಿದ್ವಾನ್ ಸುಬ್ಬಕೃಷ್ಣ ಮತ್ತು ವಿದ್ವಾನ್ ನಿರಂಜನ ಯಡಿಯಾಳ ಅವರು ಶ್ರೀ ಮುತ್ತುಸ್ವಾಮಿ ದೀಕ್ಷಿತರ ಕೃತಿಗಳನ್ನು ಆಧರಿಸಿ ವಿಶೇಷ ಸಂಗೀತ ಕಛೇರಿ ಪ್ರಸ್ತುತಪಡಿಸಲಿದ್ದಾರೆ.
ಕೊಳಲು ವಾದನ: ರಾತ್ರಿ 7:30ಕ್ಕೆ ವಿದ್ವಾಂಸ ಶಶಾಂಕ ಚಿನ್ಯ ಅವರಿಂದ ಕೊಳಲು ವಾದನ ಇದೆ.
ಪಕ್ಕವಾದ್ಯ: ವಿದ್ವಾಂಸರಾದ ಅಭಯ್ ಸಂಪಿಗೆತ್ತಾಯ(ಪಿಟೀಲು), ಶಿವಮೊಗ್ಗ ನಿಖಿಲ್ ಕುಮಾರ್(ಮೃದಂಗ), ವಿದುಷಿಯರಾದ ಬಿ.ಜಿ. ರಮಾ, ದೀಪ್ತಿ ಮತ್ತು ಧನ್ಯಶ್ರೀ (ವೀಣೆ) ಪಕ್ಕವಾದ್ಯ ಸಾಥ್ ನೀಡಲಿದ್ದಾರೆ ಎಂದು ವಿದ್ಯಾಲಯದ ಪ್ರಾಚಾರ್ಯ ವಿದ್ವಾನ್ ಜೆ.ಎಸ್. ಶ್ರೀಕಂಠ ಭಟ್ ತಿಳಿಸಿದ್ದಾರೆ.