ರಾಯಚೂರು ನಗರಸಭೆ ಉಪಚುನಾವಣೆ: ಕಾಂಗ್ರೆಸ್ ಅಭ್ಯರ್ಥಿಗೆ ಗೆಲುವು

ರಾಯಚೂರು: ನಗರಸಭೆಯ ವಾಡ್೯ ನಂಬರ್ 31ರ ಉಪ ಚುನಾವಣೆಯಲ್ಲಿ ಭಾರತೀಯ ರಾಷ್ಟ್ರೀಯ ಕಾಂಗ್ರೆಸ್ ಅಭ್ಯರ್ಥಿ ಅಂಜನಮ್ಮ ಗಂ/ ಶ್ಯಾಮ್ ಸುಂದರ್ ಅವರು ಗೆಲುವು ಸಾಧಿಸಿದ್ದಾರೆ.
ಮಂಗಳವಾರ ರಾಯಚೂರು ನಗರದ ತಹಶೀಲ್ದಾರ್ ಕಚೇರಿಯಲ್ಲಿ ನಡೆದ ಮತ ಎಣಿಕೆ ಮುಕ್ತಾಯದ ನಂತರ ಚುನಾವಣಾಧಿಕಾರಿಗಳಾ ಬಿ.ವೈ.ವಾಲ್ಮೀಕಿ ಅವರು ಹಾಗೂ ರಾಯಚೂರು ತಹಶೀಲ್ದಾರ್ ಸುರೇಶ ವರ್ಮ ಅವರ ಸಮ್ಮುಖದಲ್ಲಿ ರಾಯಚೂರು ನಗರಸಭೆಯ ವಾಡ್೯ ನಂಬರ್ 31ರ ಫಲಿತಾಂಶ ಪ್ರಕಟಿಸಿದರು. ಗೆಲುವು ಸಾಧಿಸಿದ ಕಾಂಗ್ರೆಸ್ ಪಕ್ಷದ ಅಭ್ಯರ್ಥಿ ಅಂಜನಮ್ಮ ಗಂ/ ಶ್ಯಾಮ್ ಸುಂದರ್ ಅವರಿಗೆ ಇದೆ ವೇಳೆ ಪ್ರಮಾಣ ಪತ್ರ ನೀಡಿದರು.
282 ಮತಗಳ ಅಂತರದಿಂದ ಗೆಲುವು: ಇವಿಎಂ ಮತಗಳ ಮತಪತ್ರ ಎಣಿಕೆ ಕಾರ್ಯ ಮುಕ್ತಾಯದ ನಂತರ ಅಭ್ಯರ್ಥಿ ಅಂಜನಮ್ಮ ಗಂ/ ಶ್ಯಾಮ್ ಸುಂದರ್ ಅವರು 1268 ಮತಗಳನ್ನು ಪಡೆದು ಗೆಲುವಿನ ನಗೆ ಬೀರಿದರು. ಸಮೀಪದ ಪ್ರತಿಸ್ಪರ್ಧಿ ಬಿಜೆಪಿ ಅಭ್ಯರ್ಥಿ 986 ಮತಗಳನ್ನು ದಾಖಲಿಸಿದರು. ಒಟ್ಟು 2274 ಮತಗಳ ಪೈಕಿ ಕಾಂಗ್ರೆಸ್ 1268, ಬಿಜೆಪಿಗೆ 986 ಹಾಗೂ ಇತರೆ ಪಕ್ಷಕ್ಕೆ 20 ಹಂಚಿಕೆಯಾದವು.